Menu

القديرة نادية لطفي تفتح قلبها لعفكرة وتتحدث عن الفن والسياسة والفلسفة والاصدقاء فى حياتها.

نادية لطفي لموقع عفكرة .

الإعلام عايز إعلام.. والرقابة عاوزه رقابة..

إمي كانت إنسانة محافظة جداً وأبي أيضاً

 سينما السبكى دى سينما المطاوى.. أنا أشك إنه الممول الحقيقى لهذه الأفلام.!!!

من الصعب أن نقارن بين فيلم كتبه نجيب محفوظ ومن يكتب للسبكى.

من شجعني على السيينما هو زوجي القبطان و والد ابني لأنه كان مثقفاً جداً ولم يمانع دخولي السينما.

عشقت فاتن حمامة وكنا نكلم دائماً بعضنا البعض بالهاتف

كانت تتصل بي الراحلة فاتن حمامة قبل اي مناسبة وسهرة لتعرف لون الفستان الذي سأردتي كي نردتي فساتين مختلفة وألوان مختلفة.

يوسف السباعى ومصطفى محمود كتبوا وقالوا.. إن نادية لطفى.. مدرسة جديدة.

أجدادنا عاشوا معاهدة سايكس بيكو.. احنا النهاردة بنعيش فى العالم العربى سايكس بيكو 2

حوار حسام مجدي مكتب عفكرة القاهرة.

 

 

المقدمة.

الفنانة العبقرية نادية لطفي صاحبة البصمات الواضحة سينمائيا والتي لا يخلو وجهها، رغم السن والمرض، من علامات الجمال والحيوية والأمل صاحبة “النظارة السوداء”  التى تم منحها مؤخرا الدكتوراة الفخرية بحضور عدد كبير من نجوم الفن والمجتمع .. واجهت باستبسال المرض وخرجت من المستشفى نهائيا قائلة إنها لا تريد العودة إليها مرة ثانية؛ لأنها لا تحب المستشفى، وتفضل قضاء وقتها مع حفيدتها الوحيدة ريحانة؛ فهي الأقرب إلى قلبها، فهي من تبقى لها من ريحة الحبايب، فكل ما تخشاه أن تتركها وتذهب للعالم الآخر؛ لأنها ستشتاق إليها جدا .. بعفوية وبساطة وبلهجة عامية مصرية بحتة..

كيف واجهت الموت والمرض.. وبماذا خرجت من هذه التجربة؟

مش هتصدق إنى عمرى ما خفت من المرض حتى لما عرفت إن عندى نزيف فى المخ ولازم أسافر سويسرا زمان لا حسيت برعب ولا خوف.. بالعكس كنت سعيدة .. المرض نعمة واختبار\

إيه مصدر السعادة؟

كان كل أصحابى وحبايبى جنبى.. ورغم إنى خرجت من العملية مكنتش عارفة أنا فى مصر ولا فين… كل اللى كنت مركزة فيه إن كان جوايا شعور جميل بالحياة وحاسة إنى بحلق فى السما..

إحساس عجيب رغم أنها كانت رحلة موت؟

أنا ماخدتهاش على إنها رحلة موت خدتها على إنها رحلة من الرحلات اللى وارد إنك ممكن تخوضها كل يوم

لكنها محنة؟

أنا لا أحب هذه الأحساسيس.. وغالبا بطردها دايما من خيالى.. ربنا هو القادر وقادر على إنه ينجيك.. وما احبش أزايد على ربنا وأقول.. أنا كنت قوية عشان كده اجتزت المحنة

هل هذا الشعور لإيمانك الشديد بالقضاء والقدر؟

آه طبعا.. أضع المنطق والعلم دوما أمامى وبعتمد على حاستى الشخصية ودى هبة من ربنا

الخوف يا مدام نادية.. فى ناس بتخاف ع الرزق وفى ناس بتخاف من انتهاء العمر وغروب شمس الشباب!!

أولا.. الخوف شىء ضد المنطق والعقل.. ليه أخاف.. القدر دوما بيلعب دوره والخوف معاناة بدون مبرر.. طالما جواك إيمان.. ليه نخاف؟

ده بياخدنى لمعنى.. وبيدفعنى لسؤال آخر.. عن ممارسة الإيمان بشكل عملى وغير علنى.. أى.. داخل الإنسان ذاته.. وفى ناس ملأوا حياتنا بكلام عن ربنا وأثاروا بقضاياهم ضجيجا لا ينتهى.. لكنهم وضعونا كمسلمين فى أزمة؟.

إحنا نستاهل.. فى منطق ومرجعية علمية للأمور.. لو ترجعلها مش هيكون فى مشكلة

حضرتك مؤمنة دوما.. وفى ردودك إيمان تام بالعلم والعالم؟

فى ناس مؤمنين بحاجات كتير.. أنا اطلعت على كل حاجة..

وأين وضعت يقينك؟.. بمعنى.. راحتك لقيتيها فين؟

مقتنعتش بحاجة

إيه الفكرة اللى وصلتى إليها؟

إن كل واحد يختار طريقه براحته.

من صاحب الفضل فى توجيه نادية لطفى.. ومن كان وراء تمتعك بهذه الشخصية القوية؟

البيئة الأولى.. الأسرة طبعا.. لأن الطفل بيشرب كل المفاهيم فيها.. وأهم شىء فى الطفل هو رضاعة الحب.. والأمان.. ليستطيع مواجهة الحياة

من هو صاحب التأثير الأكبر فى الأسرة؟

مفيش حد لوحده.. الأب والأم كانوا بيشكلوا وعاء واحدا.. والحقيقة.. أننى أرجع الفضل الكبير لتواجدى فى رحم السينما من علوم وثقافة وكل ما يحيط به هو كتلة واحدة كبيرة تصب فيه كل العلوم.

هل شجعك والدك ووالدتك على العمل فى السينما؟

ففاجأتنى نادية لطفى.. بتعبير الدهشة الشديدة.. وكأنها لم تتوقع سؤالى.. أمى كانت ست محافظة جدا جدا.. بل متطرفة فى تحفظها وكانت حتى لا تقبل إطلاقا منى فكرة الذهاب إلى السينما أو الاحتفاظ بصور النجوم وقتها.. وكنت أنا أعشق فاتن حمامة بجنون.. ووالدى كان وراء هذه التربية.. فلقد كان والدى معارضا تماما لدخولى مجال العمل السينمائى.. والحقيقة أن الفضل الكبير كان يرجع إلى زوجى وقتها القبطان.. عادل البشارى.. لقد كان مثقفا وقارئا نهما.. وهو لم يمانع إطلاقا عملى بالسينما.. والحقيقة.. رغم أن زواجنا كانزواجا تقليديا إلا أنه كان الحب الأول فى حياتى وعشنا عمرا مديدا وأنجبنا ابننا الوحيد. . وما زالت جسور الود والتفاهم والاحترام بيننا قائمة حتى الآن رغم الانفصال.

وابنك.. هل كان لديه اهتمام بأعمالك الفنية؟

لا إطلاقا.

مرة واحدة جاء معى السينما ليشاهد فيلم الخائنة.. وبكى بشدة وتأثر بالفيلم..

وهذا ربما لصغر سنه وقتها…

قلت لى إنك عشقتى فاتن حمامه بجنون منذ صغرك.. وإنها أحد أسباب تعلقك بالسينما.. كيف كان لقاؤكما الأول..وكيف كانت العلاقة على امتداد مشواركم الفنى؟

 تضحك نادية لطفى من قلبها.. وهى تتذكر لقاءها الأول بفاتن حمامة: مجرد دخول فاتن حمامة غرفة المكياج فى استوديو مصر وحينما شاهدتنى وكانت تعرفنى من الشاشة قالت لى.. إزيك يا نادية.. وازى ابنك؟.. لم أدر بنفسى إلا وأنا خارجة من غرفة المكياج.. ولم أتمالك نفسى مما جعل فاتن تضحك بشدة.. مع الأيام أصبحنا أصدقاء.. وسافرنا مع بعض فى أحد المهرجانات وكانت تسألنى قبل أى سهرة.. عن الفستان الذى سارتديه ولونه.. حتى ترتدى كل منا شيئا مختلفا عن الأخرى.. والحقيقة.. أنى فضلت حتى آخر أيامها لا أصدق أننا أصدقاء على الإطلاق وأشعر أن عندى شخصيتين.. واحدة فى العلن.. أتحدث معها ونفضفض مع بعض فى كل شىء.. وشخصية أخرى لا تصدق أنى أصبحت صديقة لفاتن حمامة..

وهل صارحتيها بهذه المشاعر؟

آه.. وماتت على روحها من الضحك.. ولحد آخر لحظة كل ما تقولى كلمتك وماردتيش عليه.. أقول بينى وبين نفسى.. يا نهار أبيض.. إزاى مردش على فاتن.. فى حد ميردش على فاتن حمامة؟

وهل ظل التواصل بينكما دوما من خلال التليفون؟

لا.. كنا بنتواصل تليفونيا بين الحين والآخر وكلما أتيحت الظروف كنا نلتقى..

مين من السينمائيين الكبار اللى كان لتوجيههم ليكى أثر كبير فى مشوارك؟

يوسف شاهين.. لما فكرت إنى أسافر أمريكا آخد كورس تمثيل فى لوس أنجلوس.. اتفاجئت بيه بيقول.. أوعى تعملى كده.. وكان له وجهة نظر.

قالى.. فاتن حرفجية درجة أولى.. وانتى تلقائية ومش حتبقى زيها عمرك.. وده اللى بيميزك.. تلقائيتك الشديدة.. فإوعى تفقديها بتمارين ودراسات.. وده أتاكد لما يوسف السباعى ومصطفى محمود كتبوا وقالوا.. إن نادية لطفى.. مدرسة جديدة.

بمعنى؟

بمعنى إنى خرجت من تأثير فاتن حمامة وقتها.. لأن كل الممثلات اللى ظهروا فى ذلك الوقت.. زى آمال فريد.. لبنى عبدالعزيز.. ودى ملهاش زى.. وزبيدة وكاريمان ومنيرة سنبل..

فاتن كانت رائدة.. والشلة اللى طلعوا معظمهم كانوا بيحاولوا يقلدوا فاتن وخصوصا ماجدة.. كانت تقلد فاتن.. وكانوا بيبالغوا فى الرقة.. كانوا رقاق أوى.

وشادية فين من كل دول؟

كانت بره كل دول.. جاية من مدرسة ليلى مراد اللى بتغنى ودمها خفيف كده

يمكن فى هذا الوقت كانت تصنف مطربة أكتر؟

فى الأول..لكن بعد المرأة المجهولة الأمر اختلف.. بدأت تبقى ممثلة والأمر اختلف.

هل كان بينكم يوما ما صداقة؟

لا مش صداقة معايا.. هى كانت صديقة صديقى المخرج حسين كمال..

وكانت تأتى لبروفات مسرحية بمبة كشر.. وقتها كانت زوجة صلاح ذوالفقار

أكتر ما كان يميز شخصية شادية؟

شادية أنثى بكل سلوك الأنثى.. ويمكن عشان كده ما بقناش أصدقاء لأن سلوك الأنثى أنا مبحبهوش.

إذن.. من من الفنانات كنت صديقة وقريبة منهن؟

مش هتتخيل.. كانت أول وأكتر صديقة لى هى السيدة زينب صدقى.. عميدة المسرح وشلتها كلهم بقوا أصدقائى.. وكان بيعجبنى مخها جداا.. فاتعرفت عن طريقها على أمينة رزق.. ونجمة إبراهيم.. وزوز حمدى.. وكان صديقى جدا زكى طليمات.. وأحمد مظهر طبعا أقرب الأصدقاء. ومعظم أصدقائى كانوا أكبر منى سنا.. لم أكن أميل كثيرا لمصادقة من هم فى سنى.. سميحة أيوب طبعا.. وسعد الدين وهبة.. وهما اللى عرفونى على حسين كمال المخرج.. وأنيس منصور.. وأحمد رجب.. دول أول ناس اتعرفت عليهم فى الوسط.

وماذا عن سعاد حسنى ؟

سعاد كانت صديقتى وكانت أختى فى الوقت نفسه أحزن كثيرا عندما اتذكر حادثة وفاتها وانا على ثقة بانها ماتت مقتولة.

اختلفت مع أنيس منصور سياسيا.. أعتقد بسبب كامب ديفيد؟

آه.. أنا مش عنيفة لكن حادة.

إيه الفرق.. بين العنف والحدة؟

حادة.. يعنى نضيفة.. العنيد ممكن يطرطش.

لكن لحد الآن.. مدام نادية مازالت وجهة نظرك فى كامب ديفيد كما هى؟

آه.. بس لما تدرس الأمر.. تلاقى إن كامب ديفيد.. مجبر أخاك لا بطل.. لكن فى فورمة عمل سياسية واقتصادية.. فى النهاية انت طالع خسران خسران.

حتى الآن رغم كل هذه الأحداث التى تعيشها فلسطين والأمة العربية مازال عندك نفس القناعة.؟

كلام فاضى.. الخريطة العربية خلصت.. إنت أنهيت القارة.

مش شايفة إن سينا رجعت تانى لينا؟

آه.. بس لما تدرس الأمر.. تلاقى إن كامب ديفيد.. مجبر أخاك لا بطل.. لكن فى فورمة عمل سياسية واقتصادية.. فى النهاية انت طالع خسران خسران.

حتى الآن رغم كل هذه الأحداث التى تعيشها فلسطين والأمة العربية مازال عندك نفس القناعة.؟

كلام فاضى.. الخريطة العربية خلصت.. إنت أنهيت القارة.

مش شايفة إن سينا رجعت تانى لينا؟

عادت إيه.. وبإيه؟ أنا عامله فيلم وثائقى من إنتاجى وصرفت عليه دم قلبى علشان أثبت إن دى أرض مصرية.. سيناء منزوعة السلاح.. محددة عدد الجيش بطبنجات صغيرة قد كدة.

وهل كنا سنسترد سيناء اليوم بالحرب؟

مفيش مستقبل.. حفضل بعد 30 سنة أحكى الحكاية ليه.. منا ضيعت القارة.. هات الجغرافيا.. الجولان راحت فين.. الأردن راح نصها.. فاضل مين تانى؟

هل اقتراب الفنان من العمل السياسى بيأثر على عمله الفنى.. وأن اشتغال الفنان بالعمل السياسى يجب أن يكون من خلال أعماله الفنية؟

إنك تنشغل بقضية ما وتثور لنصرة مبدأ معين.. ده ممكن جدا ما تقدرش تجسده على الشاشة.. يعنى أنا بعد 67 كنت بصور فيلم مع أحمد مظهر وكل شوية نعيد لأن الدموع عماله تنزل من عينى لحد ما مظهر قالهم.. روحوها.

ولما جانى الريجسير لحد البيت يبلغنى بمعاد التصوير.. طردته.. وقلتله تمثيل إيه دلوقتى.. الناس بتموت.. يعنى لما بتفرج على الزملاء اللى عملوا أفلام وطنية.. لا أشعر بالندم إطلاقا.. لأنى مكنتش أقدر اعملها.. كانوا حيطردونى لأنى مش قادرة أمثل.

لما تقعدى النهاردة أمام قنوات الأفلام اللى اشترت تراث السينما العربيه.. وكنت أكيد معارضة لهذه الصفقة.. هل مازلت حزينة لأنك خسرتى هذه المعركة..أم سعيدة لأنهم قدروا يحموا هذا التراث ويقوموا بترميمه؟

 أنا بالفعل خضت معركة شرسة جدا.. وعطلت بيع الأفلام العربية لسنوات قبل أن ينجحوا فى شرائها مرة أخرى.. وعارفة إنى دفعت تمن موقفى هذا من عداء القائمين على هذه القنوات.. إلا أن.. هذا لا يمنع أننى مازلت أرى أنه كان من المفروض إن يهيمن على هذا التراث الحكومة المصرية.. لكن طبعا ورثة المنتجين فضلوا المكسب السريع.. هنقول إيه..؟

واضح إن مكانش فى فلوس علشان نحافظ على هذا التراث ملكا لنا هنا فى مصر.

بمناسبه الحديث عن السياسة… ما نعيشه هذه الأيام من أحداث فى مصر والعالم العربى… ممكن تشكل أحداث لفيلم عيشتيه؟

أجدادنا عاشوا معاهدة سايكس بيكو.. احنا النهاردة بنعيش فى العالم العربى سايكس بيكو 2

حضرتك شايفة سايكس بيكو جديدة بدأت بالفعل واتخذ قرارها؟

لو انت بتقرا تاريخ مش هتستغرب.. احنا عندنا التاريخ بدا من ثورة 23 يوليو.. كل ما قرأته من تاريخنا يجعلنى أقف وأفكر.. ولا أنساق مثل معظم الناس لأى كلام يتقال.

الناس مبيقروش خالص وبيسمعوا دلوقتى.. بحبك يا حمار.. والتليفزيون كمل الكارثة.. والمصيبة إنهم بياخدوا تاريخهم من الأفلام والمسلسلات.

وهى الأفلام والمسلسلات لا تعطى تأريخا لأحداث حقيقية؟

طبعا أوقات كتير بيدخل فيها خيال المؤلف.. وتدخل منتج.. ورؤية مخرج ماينفعش.. لازم الناس تقرا تاريخهم عشان يفهموا هما فين.. وإيه اللى بيحصل فيهم.

الإعلام مدام نادية.. لا يقدم هذه الرسالة.. ويقوم بتوعية الناس؟

الإعلام عايز إعلام.. والرقابة عاوزه رقابة..

الشعب المصرى محتاج يقرا فقط ولا محتاج إيه كمان؟

محتاج كتير لأنه صايم صيام الدهر..

أى نوع من الصيام..؟

كل أنواع الصيام.. النفسى.. والغذائى.. والعقلى.. والفكرى..

صايم باختياره ولا فرض عليه؟

مفروض عليه.. أنا حتجنن إنه يتقال على الشعب مش نضيف.. طب عارف النضافة مكلفة قد إيه؟ طب منين لو مش لاقى ياكل؟

إنتى بتشفقى على الشعب المصرى.. وهناك آراء بتدين هذا الشعب؟

مين اللى يجرؤ إنه يدين الشعب المصرى.. من يدين الشعب المصرى شخص غير محترم.. طب هسألك سؤال.. أنا جالى كتاب طب.. حتشتريه بكام؟

100 جنيه.

مين معاه 100 جنيه يشترى بيها كتاب؟

حتى الطبقات القادرة لا تقرأ

بس دى طبقة ليها اختياراتها وقدراتها.. وأنا بكلمك عن 70 % من الشعب ومبقاش فى وحدة فكر.. واتقسمنا سياسيا ودينيا وثقافيا.. حتى خريج الألمانية مش حيلتقى فكريا مع خريج الأمريكية

هل تقصدين أننا جميعا أصبحنا فى جزر منعزلة؟

أنا بدى الفكرة كاملة، وبدى مثل من ضمن دايرة كبيرة.. أنا بتكلم عن 90% معهمش يجيبوا كتاب ولا جورنال.. والطبقة الوسطى انقرضت وتلاشت.. والطبقة الجديدة اللى طلعت.. فئة مش بتاعة قرايه وجرايد.. بتاعة شم ومخدرات.

هل غياب السينما عن دورها.. أثر سلبيا بشكل كبير على ثقافة المصريين؟

السينما نفسها طردت السينمائيين الحقيقيين.. وسابوها للطبقة اللى كانت بتقعد على القهاوى.. وهى اللى بتكتب تاريخ السينما المصرية النهاردة.. والسبكى هو اللى بيألفها! والطبقة الجديدة دى هى القوة الشرائية الحقيقية.

اللى هما مين؟

الطبقة الجاهلة كلها.. أمال السبكى بيدخله ملايين منين.. من العيال بتاعة المطاوى..

هل تتابعى سينما السبكى؟؟

دى سينما المطاوى.. أنا أشك إنه الممول الحقيقى لهذه الأفلام.

بمعنى؟

ده مركز خطير جدا لتخريب الشباب.. وللأسف نجح فى ده.. لأنه معتمد على الطبقة الجاهلة. وبعدين فى ناقد بيقولك إيه.. مش لازم الفيلم يرضخ لما يطلبه الجمهور.. لا.. الجمهور مطلبش.. إنت بتقدمله وجبةجاهزة وفارضها عليه.. الجمهور مجاش قالك أنا عاوز سينما المطاوى.. فى مركز إنتاجى وتمويل بيفرض عليه هذا المصنف.. أقبلت عليه الطبقة المنبهرة بالشكل ده لأنها نشأت فى العشوائيات.. ودى اللغة اللى بيستخدموها.. فأنت عملتلهم ده مثل أعلى، وجبتلهم واحد منهم عملته بطل.. وبت قالعه ملط.. احنا كمان فى أجيالنا كان فى ملط..

بس ملط الباليه يفرق عن ملط فتيات الليل.. دى حاجة ودى حاجة.. شوف لما ييجى يتعاقد مع نجم كبير وأنا ليا عتاب عليهم.. وده عشان يكسر عينه ويخليه يوافق إنه يشتغل معاه.. ويرتبط اسمه بهؤلاء النجوم الكبار.

لكن حتى العصر الذهبى للسينما المصرية كان الرقص موجود طول الوقت وحضرتك قدمت أدوار راقصة؟ ما هو الفرق بين رقص الخمسينات.. ورقص سينما السبكى؟

هو هو.. لكن مع الفرق فى التوظيف داخل الدراما.. لكن من الصعب أن نقارن بين فيلم كتبه نجيب محفوظ ومن يكتب للسبكى.

لكن السبكى حاليا هو من ينتج فقط.. وبدون إنتاجه ستتوقف السينما تماما؟

اسمحلى دى مقولة مغلوطة عشان نقول يعيش السبكى.. لكن ملعون السينما لو حتقوم على إيد بؤرة السبكى.

امال وطموحات المصريين كانت متعلقة بقرارات من مجلس النواب لكن المفاجاة ان اغلبها لم يتحقق ؟

أنا بطلت أتفاجئ ومندهشة جدا من اللى اتفاجئوا بنواب مجلس الشعب.. ده على اعتبار إن الأمر كان سرى للغاية.. ما هما دول المرشحين.. وهما دول اللى الشعب انتخبهم.. ليه بقه الدهشة؟ وليه المفاجأة؟

أنا ست بقرأ جيدا المشهد قبل أن تدور الكاميرا.. وبالتالى لا أندهش إطلاقا حينما أرى المشهد تمثيلا.. وحوارا.. وتصويرا.. لأنى كنت قريته.. وبالتالى.. نصيحة لكم جميعا.. تعلموا أن تقرأوا.. اقرأوا الأحداث وما قبلها.. وما بعدها.. اقرأوا الظروف التى تحيط بالحدث.. أيا كان هذا الحدث.. اقرأوا التاريخ حتى لا تصدموا.

فيديو اليوم