“لأخر نفس” هذا المسلسل اللبناني الذي خطف قلوب المشاهدين لإكتشاف أحداث الحلقات التي تجمع النجوم في حكايات تشبه حياتنا اليومية في لبنان.
“ل آخر نفس” كتابة سيناريو وحوار الممثلة اللبنانية كارين رزق الله التي تبهرنا من سنةٍ الى أخرى بروعة كتابتها للمسلسلات التي تطل على شاشاتنا وتدخل بيوتنا.
لذا قررنا التوجّه عند جوليا لنأخذ “لوحة عيون” للصالون عندنا!! لا بل طبعاً تحدثنا مع سبب ضحكة المَشاهد والمُشاهد في المسلسل أي مع الممثلة ريتا عاد التي أجرينا معها هذا الحديث الممتع حول دور “جوليا” وباقي أعمالها التمثيلية.
كيف تفاعلتي مع دور جوليا المميّز والقريب لقلوب العالم بمسلسل “ل آخر نفس” خصوصاً إنو الشخصية بتطرح قضية حسّاسة بالمجتمع اللبناني؟
دور جوليا حبّو الناس ومُحَبّب عقلوب اللبنانيين كثير، أول شي لأنو القضية عم تنطرح بطريقة سِلسة ومهضومة ومع ضحكة، حتّى إنو في كثير كثير من العالم بيبعتولي إنو “إنشالله تجيب ولد”، يمكن لأن حسّو بحنية الإم حسّو إنو مش طالبة شي وإنو مش طلبت شي من خلالو بدا تإذي حدا أو تضايق حدا، بس بدا يكون عندا ولد والموضوع كلّو عن الأمومة وإنتِ بتعرفي الإم هي المجتمع وخاصةً إذا عندا شغف تربي هالطفل وتحمي ومنشوف جوليا بتقول كثير بالمسلسل “أنا بحمي”.
هالقضية ما مفروض تكون حسّاسة ما نحنا شعب منحبّ العيلة ولأنو هاي قضية إم، وأنا حسيّت إنو كل العالم تجاوبت مع جوليا، ولكن هون خليني قول إنو أكيد وجود الأب ضروري وكثير لأن بساعد على نمو الطفل فكرياً ومن كل النواحي بس إذا أخدنا مثل جوليا يلي ما عم تلاقي حدا يتجوزا ورح توصل لمرحلة الطمث (menopause) طيب شو بتعمل؟ بتضل لحالا تبكي بالسنين يلي بقيتلا بتتفرج عولاد غيرا؟
بالنسبة إلي بشوف إنو لازم يصير في قانون يحمي هالموضوع ويسمح في، بالأخص إنو منو جديد، ليك العالم وين صارت ونحنا وين!! وأنا أكيد مع هالقضية بالحياة.
شفناكي بمسلسل “قلبي دق”، “مش أنا” وهلق بِ “ل آخر نفس”. كل شخصية شو عم تترك أثر بحياة ريتا الممثلة؟
بِ “قلبي دق” كنت أول مرّة بوقف قدام كاميرا، هوي أصلاً ما بحياتي فكرت مثّل أو ادخل بهالمجال، أنا كنت بس عم أعمللا relooking لكارين وشافوا العالم التغيير وتفاجئو وأنا كنت درست بنيويورك وجيت على لبنان وهيك عرفت عني كارين وطلبت تغيّر الستايل واللوك، وهون قالتلي “عندي دور كتير مهضوم بالمسلسل بتمثلي؟” قلتللا إنو أنا مش ممثلة ولا ممكن!! هون ردت عليّي كارين وقالتلي: “كوني إنتِ لأنو عفويتك وطبيعتك شكلي عم إكتشف نجمة”. فمثلّت الدور مع والناس كثير حبّو وأنا حسيت حالي عم إلعب وإتسللا.
ثاني سنة عرضت عليّي دور بِ “مش أنا” وقلتلي بدي تمثلي معي وبدي هالمرّة أعطيكي دور أقوى وفي رسالة، فأخدت دور الرقص وأنا كثير بحب الرقص ورحت درست أربعة شهور الرقص الشرقي لمثّل الشخصية من كل قلبي وحبيّتو كتير لدوري خصوصاً إنو الممثل يلي كان قدامي كان إستاذي عطاني كثير نصائح فحسيت حالي فتت بالمجال.
هلق بدك تقوليلي بترسمي وimage consultant وممثلة!! كلّن بمجال الفن وأنا كثير بحبّ الفن مثلاً إذا كنت زهقاني بقعد برسم لوحة، فإجت قصة الرسم بمسلسل “ل آخر نفس” وإنو أنا عندي كثير معارض فنغرمت بدوري، وبالفعل عملت 26 لوحة ورسمت هول العيون لأن كان بدي إرس مشي بخوّف فأخدنا فكرة العيون بس هلق الناس بتقلي “بدنا لوحة منك من لوحات المسلسل”.
فكان حلو كثير الدور وطبعاً ردود فعل الناس رائعة إن كان من خلال التعليقات أو الرسائل، وأنا أصلاً حالياً بفرنسا ما عم أعرف شو عم يصير بلبنان بس كثر ما بيجي رسائل وتعليقات بقول هلقد عامل هالدور!! والحمدلله عمحبة العالم وبفتكر لو حايلا موضوع طرحتو بهالطريقة كانوا حبّو الناس وتفاعلوا نفس الشي.
قدي حلو النجاح مع الكاتبة والممثلة كارين رزق الله؟
النجاح حلو كثير، وإنو الناس تحبّك من دون ما تعرفك هيدا يلي بيصدمني. هلق أنا هيك عفوية ويلي براسي بقولو وبحبّ الناس وبضحك أصحابي وحتّى ولادي بقولولي: “Mom you’re not even a mom” قد مني أصحاب أنا وياهن. بدافع عن الأطفال وما بقدر شوف ولد عم يتعذب لا فكرياً ولا جسدياً كثير بتضايق.
حبيت كثير النجاح طبعاً والنّص كثير حلو وهيدا شي كثير مهم.
الفن التشكيلي من خلال الألوان واللوحات مع التمثيل بحفزوكي للإستمرار والتقدم بالنجاح والحياة؟
أكيد الفن التشكيلي أهم شي، ما تتخايلي قدي بحفز لأن أصلاً هوي thérapie بحد ذاتها، وأنا ما بشتغل إلا بالpeinture لأنو بحسّ في غنى كثير والطريقة يلي بشتغل فيا على لوحات كبيرة. من هون هالفن بحسّسك إنو فضيتي كل شي وبالنقاوة وقدي حلوة الحياة، بِفَجّر كل شي فيكي.
ولما بتمثلي بتحسي حالك طايرة لا بعود شوف كاميرات ولا بردّ على شي خلص بتصرف على طبيعتي. أهلي وأصحابي وإخواتي بقولولي “ريتا! كأن قاعدين معك، ما معقول” فأكيد هالشي كثير بساعد .
وفي ختام حديثنا مع الممثلة ريتا عاد قالت:
وأنا كثير مبسوطة وناطرة إنزل على لبنان بالشهر الجايي وشوف كل هالناس الحلويين وانشالله عطول بالنجاح وتحقيق الأحلام”.
يُذكر أنّ الكاتبة والممثلة كارين رزق الله طرحت العديد من المسائل والقضايا التي تطال المجتمع اللبناني وناسه من كل الجوانب ونحن بدورنا نعد فريق العمل أننا سنتابع كل لحظة بلحظة في هذا العمل حتّى لو… ل آخر نفس!!!
ريتا بريدي
